Само во Македонија: 61% од вработените во министерство земале плата без да одат на работа

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Само во Македонија: 61% од вработените во министерство земале плата без да одат на работа

04 март 2026

• од Станча Јаќимовски

Најновиот извештај на Државниот завод за ревизија открива сериозни неправилности и сомнежи за злоупотреби во Министерството за односи меѓу заедниците за време на раководењето на Артан Груби. Наместо институција која треба да служи на граѓаните, ревизијата укажува на систем во кој со години се трошеле јавни средства без соодветна контрола и одговорност.

Најшокантниот податок од извештајот е дека дури 61 процент од вработените во Министерството примале плата без доказ дека воопшто се појавувале на работа. Од вкупно 244 вработени, дури 150 лица биле исплаќани преку програмата за правична застапеност и како преведувачи, но без да постои доказ за нивно присуство или извршена работа, и покрај тоа што институцијата имала електронски систем за евиденција на работното време. Овој податок отвора сериозни сомнежи за масовна злоупотреба на буџетски средства.

Покрај платите без работа, ревизорите утврдиле и необјасниво исчезнување на опрема и средства. При годишниот попис не биле пронајдени 30 лаптопи, а дел од основните средства во вредност од над 25.000 евра едноставно исчезнале. Причината, според ревизијата, е елементарен недостаток на контрола и недостиг на процедура за задолжување на вработените со службената опрема.

Дополнително, во извештајот се наведува дека 8.367 евра биле потрошени за гориво без никаква контрола, без проверка на регистарските таблици или типот на гориво. Ова отвора сомнеж дека државни пари биле користени за полнење гориво во приватни возила.

Сериозни пропусти се утврдени и во распределбата на средства за невладини организации. Министерството доделило 320.900 евра на 33 здруженија и фондации, но дури 17 од нив не доставиле докази како ги потрошиле средствата. Поради тоа, ревизијата наложува враќање на речиси 20.000 евра во државниот буџет.

Новиот министер за односи меѓу заедниците, Иван Стоилковиќ, изјави дека ревизијата само ги потврдила сомнежите за хаос и злоупотреби во институцијата. Според него, сите утврдени случаи се документирани и веќе се доставени до надлежните институции, вклучувајќи обвинителство и финансиска полиција.

Скандалозните наоди на ревизијата оставаат сериозни прашања за тоа како една државна институција со години функционирала без реална контрола, додека јавните средства се трошеле на сомнителен начин. Сега останува на надлежните органи да утврдат дали ќе има одговорност за злоупотребите кои, според извештајот, се случувале системски и подолг временски период.