Балканот ни се потсмева: Славниот Вардар не може да собере ниту 3.000 гледачи за меч во Лига на шампиони!!?

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СПОРТ

Балканот ни се потсмева: Славниот Вардар не може да собере ниту 3.000 гледачи за меч во Лига на шампиони!!?

08 јули 2026

• од Темелко Тошев

Покрај очајното издание кое го демонстрираше Вардар во првото квалификациско коло од Лигата на шампионите против финскиот КуПС, како и аматерската подготовка на тимот за еден ваков европски предизвик на кој се чекаше повеќе од шест години, „црвено-црните“ се најдоа во фокусот на регионалното внимание поради уште една поразителна причина – очајната посета на нашиот најголем стадион.

Апатија, бојкот или тивка „војна“?

Вардар, де факто, од поодамна не привлекува внимание кај сопствената навивачка и симпатизерска база од главниот град. Иако се работи за натпревар од елитно европско натпреварување, се чини дека интересот е драстично опаднат дури и кај добар дел од најверната навивачка група „Комити“. Познато е дека тие од почетокот на минатата сезона се во „војна“ со актуелниот извршен директор на клубот, Миленко Неделковски, па колку и да постои некое привидно договорено „примирје“, последиците се очигледни.

Крајниот епилог од целата оваа ситуација беше мачна слика: официјално само 3.512 гледачи на трибините на арената „Тодор Проески“ во Скопје на натпреварот против Финците. Што би се рекло, исполнет беше едвај околу 10% од капацитетот на Арената.

Регионот во неверување: Каде исчезна македонскиот гигант?

Оваа бројка и тоа како привлече внимание кај регионалните и европските медиуми, кои се вчудоневидени од слабата поддршка која ја има некогаш славниот Вардар – едно од најголемите фудбалски имиња во поранешна Југославија.

Босанскиот спортски портал „Спортспорт“ посвети посебно внимание на овој феномен, истакнувајќи го разочарувањето од празниот стадион:

„Само 3.512 гледачи се собраа на најголемиот стадион во Македонија, што е навистина разочарувачка бројка за европски натпревар од ова значење. Особено кога знаете каква историја има Вардар и колку многу значеше овој клуб за генерации навивачи. Во минатото, името Вардар беше синоним за полни трибини, одлична атмосфера и голема поддршка од сите страни, додека денес сликата изгледа сосема поинаква.“

Модерниот фудбал бара многу повеќе од „стара слава“

Босанскиот медиум прецизно ги лоцира причините за овој пад, посочувајќи дека модерниот фудбал одамна е многу повеќе од само 90 минути игра на теренот. Клубовите денес инвестираат огромни ресурси во маркетинг, промоција, социјални мрежи, фан зони и целосно искуство за навивачите.

„Проблемот со малата посетеност беше дискутиран и во деновите пред натпреварот. Бројни навивачи, како и луѓе блиски до клубот, предупредија дека со години е вложено премалку труд за поврзување со публиката. Вардар има богата традиција и големо име, но тоа веќе не е доволно за да привлече илјадници луѓе на стадионот.“ – додаваат од Спортспорт.

Лекција која раководството мора да ја научи

Како што заклучуваат медиумите од соседството, голем клуб не е составен само од трофеи од минатото. Пред сѐ, тој е составен од полни трибини и силна врска со навивачите. Токму тоа ја покажува успешноста на едно раководство.

Недостатокот на квалитетна промоција, организирани активности за публиката, модерна продавница за реквизити и континуирана комуникација оставија длабоки лузни кои денес јасно се гледаат на трибините. Навивачите сакаат чувство на припадност и сакаат да бидат важен дел од иднината на клубот. Кога тоа го нема, интересот полека згаснува, без оглед на името на противникот или важноста на мечот.

Вардар ќе мора многу повеќе да работи на овој сегмент доколку сака да се врати на старите патеки – да биде симбол на македонскиот фудбал кој без проблем ги полни стадионите во европските вечери. Времето на живеење од стара слава е одамна поминато.